സ്വന്തം ലേഖകന്: ഇന്നറിയാം! കേരളമുള്പ്പടെ അഞ്ച് സംസ്ഥാനങ്ങളില് ഇന്ന് വോട്ടെണ്ണല്, ഫലം ഉച്ചക്കു മുമ്പ്. രാവിലെ എട്ടിനാണ് വോട്ടെണ്ണല് ആരംഭിക്കുക. ആദ്യം തപാല് വോട്ടുകളും പിന്നാലെ യന്ത്രങ്ങളിലെ വോട്ടും എണ്ണും. ആദ്യ സൂചനകള് 8.30ഓടെ ലഭ്യമാവും. ഉച്ചക്ക് മുമ്പ് മുഴുവന് ഫലങ്ങളും പുറത്തു വരും.
80 കേന്ദ്രങ്ങളില് കനത്ത സുരക്ഷയിലാണ് വോട്ടെണ്ണല് നടക്കുക. ഓരോ മണ്ഡലത്തിലെയും വോട്ടെണ്ണല് ഹാളുകളില് വരണാധികാരിയുടേതുള്പ്പെടെ പരമാവധി 15 മേശകള് ഉണ്ടാകും. തപാല് വോട്ടുകള് എണ്ണി അര മണിക്കൂറിനുശേഷം വോട്ടുയന്ത്രങ്ങളിലെ വോട്ട് എണ്ണിത്തുടങ്ങും. അനിഷ്ട സംഭവങ്ങള് ഒഴിവാക്കാന് കനത്ത സുരക്ഷാ സംവിധാനം പൊലീസ് ഒരുക്കിയിട്ടുണ്ട്.
ഓരോ മണ്ഡലത്തിലും ഏറ്റവും കൂടുതല് വോട്ട് നേടുന്ന ആദ്യ രണ്ട് സ്ഥാനാര്ഥികളുടെ വിവരങ്ങളും ലീഡ് നിലയും മുഖ്യതെരഞ്ഞെടുപ്പ് ഓഫിസറുടെ വെബ്സൈറ്റായ www.ceo.kerala.gov.in ല് ലഭ്യമാകും.
140 മണ്ഡലങ്ങളിലായി 1203 സ്ഥാനാര്ഥികളാണ് മത്സരിച്ചത്. ആകെ 26019284 വോട്ടര്മാരില് 20125321 പേരാണ് സമ്മതിദാനാവകാശം വിനിയോഗിച്ചത് (77.35 ശതമാനം പോളിങ്).
കേരളത്തിനൊപ്പം പശ്ചിമ ബംഗാള്, അസം, തമിഴ്നാട്, പുതുച്ചേരി നിയമസഭകളിലേക്ക് നടന്ന തെരഞ്ഞെടുപ്പിന്റെ വോട്ടെണ്ണലും രാവിലെ എട്ടിന് ആരംഭിക്കും. ഉച്ചക്ക് 12 ഓടെ ഫലം പൂര്ണമായി അറിയാം. തമിഴ്നാട്ടിലും അസമിലും ഭരണമാറ്റം ഉണ്ടാകുമെന്നാണ് എക്സിറ്റ് പോള്. പശ്ചിമ ബംഗാളില് തൃണമൂല് കോണ്ഗ്രസ് ഭരണം നിലനിര്ത്തുമെന്നാണ് പ്രവചനം. അസമില് ബി.ജെ.പിക്ക് ഭൂരിപക്ഷം ലഭിക്കുമെന്നാണ് എക്സിറ്റ് പോള് സൂചിപ്പിക്കുന്നത്.
നിങ്ങളുടെ അഭിപ്രായങ്ങള് ഇവിടെ രേഖപ്പെടുത്തുക
ഇവിടെ കൊടുക്കുന്ന അഭിപ്രായങ്ങള് എന് ആര് ഐ മലയാളിയുടെ അഭിപ്രായമാവണമെന്നില്ല